فحلقة جديدة من مغامرات “المقدم النايضة” فمراكش، خرجات فضيحة كبيرة بطلها عون سلطة من درجة مقدم، اللي ولا كيدير جولات فمطاعم وحانات جيليز وكايجمع “الزرورة” بطريقة لا تخطر على البال!
وحسب مصادر إعلامية، فالمقدم استغل مناسبة ولادة عند سيدة نافذة باش يفتح مذكرات الهواتف، وبدون تردد بدا كيتصل بمسيري ومالكي الحانات والمطاعم، مطالباً منهم “المساهمة” فهاد الحدث السعيد، ولكن بأسلوب تهديدي خلاهم مضطرين يدفعو.
النتيجة؟ 45 مليون سنتيم تجمعات ليه فجيبه بكل سهولة! الطريقة الاحترافية اللي دار بها هاد العملية، والسيارة رباعية الدفع اللي كيدور بها، وحتى شاحنات نقل اللحوم اللي كاتجوب مراكش، كلها عناصر كتبين أن القصة ديالو تستاهل تتحول لفيلم جماهيري، وربما تنافس “نايضة” ديال سعيد الناصري!
القضية مازال ماوصلاتش لآخر فصولها، والناس كيتسناو شنو غادي يوقع فهاد الفيلم الواقعي اللي كتعيشو المدينة الحمراء.
